(粵)周柏豪美國巡演驚聞槍聲

周柏豪昨日(六月三日)出席護膚品品牌活動時，獲得鍾鎮濤女兒鍾嘉晴到場支持，柏豪笑言嘉晴一直有留意自己的音樂，又謂B哥哥是媽咪的偶像，自己亦希望可以像對方一樣Keep得咁好；另外，剛從美國巡演返港的柏豪更透露在當地遇上萬分驚險的事，「有晚瞓到半夜三點幾，突然聽到三下槍聲，之後就有個女人喺度嗌，但因為真係太夜喇，我都唔敢去睇吓發生咩事！其實身邊啲工作人員都有提醒我，如果喺當地揸車的話，盡量都唔好響安，同做一啲挑撥性嘅行為，所以我都會好小心注意言行舉止。」