(粵)心急生女 丁子高搵林師傅教路

踏入羊年，唔知係咪羊年有羊群效應，娛圈好多藝人歌手都宣布要停工生仔，生完一個又話要追多個，為家庭增添熱鬧氣氛。而同楊千嬅婚近六年，已經育有一個金叵羅丁進諾（Torres）嘅丁子高，近日都開晒咪咁話，好想老婆可以同佢追生一個女，為家庭湊夠一個好字。之不過生仔生女好講天意，日前丁子高出席黎芷珊自家太陽眼鏡品牌宣傳活動時，見到同場嘅玄學家林炳南，就即時兩眼發光，拉埋林炳南師傅密密斟，向對方賜教生女秘技。